انصار: ( د غویی 13مه)، د ننګرهار امنيه قومانداني په دې ولايت کې د څه باندې ۳۴زره ټابلېټ ګوليو د نيولو خبر ورکړی دی.
د ننګرهار امنيې قوماندانۍ وياند عبدالبصیر زابلي ويلي، د دې قوماندانۍ د نشه يي توکو پر وړاندې د مبارزې مدیریت منسوبينو د مومندرې ولسوالۍ په مربوطاتو کې ۲۷زره ۸۰۰ ټابلېټ کا ګولۍ نيولې دي.
زابلي ويلي، دا ګولۍ يې په يو کور کې موندلې او په تړاو يې يو تن هم نيول شوی.
نوموړي په ورته مهال زياته کړې چې د ننګرهار ولايت د استخباراتو لوی رياست امنيتي منسوبينو هم ۶زره ۴۰۰ ټابليټ کا ګولۍ نيولي دي، چې په خبره يې، وروسته يي د ننګرهار ولايت امنيه قوماندانۍ د نشه يي توکو پر وړاندې د مبارزې مدیریت ته سپارلي دي.
د ننګرهار امنيې قوماندانۍ وياند همداراز ويلي، چې په بټي کوټ ولسوالۍ کې هغه الټو ډوله موټر هم نيول شوی، چې ۲۴ کيلو شيشه او ۲ کيلو هيرويين پکې ځای پر ځای شوي وو.
هغه ويلي، موټرچلوونکي تښتېدلی خو د نيولو هڅې يې پيل شوې دي.
URL تعقيب: https://www.ansarpress.com/pashto/31381
